چلے مقتل کی جانب اور چھاتی کھول دی ہم نے

چلے مقتل کی جانب اور چھاتی کھول دی ہم نے

بڑھانے پر پتنگ آئے تو چرخی کھول دی ہم نے

پڑا رہنے دو اپنے بوریے پر ہم فقیروں کو

پھٹی رہ جائیں گی آنکھیں جو مٹھی کھول دی ہم نے

کہاں تک بوجھ بیساکھی کا ساری زندگی ڈھوتے

اترتے ہی کنوئیں میں آج رسی کھول دی ہم نے

فرشتو تم کہاں تک نامۂ اعمال دیکھو گے

چلو یہ نیکیاں گن لو کہ گٹھری کھول دی ہم نے

تمہارا نام آیا اور ہم تکنے لگے رستہ

تمہاری یاد آئی اور کھڑکی کھول دی ہم نے

پرانے ہو چلے تھے زخم سارے آرزوؤں کے

کہو چارہ گروں سے آج پٹی کھول دی ہم نے

تمہارے دکھ اٹھائے اس لیے پھرتے ہیں مدت سے

تمہارے نام آئی تھی جو چٹھی کھول دی ہم نے

chale maqtal ki janib aur chhati khol di ham ne

barhane par patang ae to charkhi khol di ham ne

para rahne do apne borye par ham faqiron ko

phati rah jaengi ankhen jo mutthi khol di ham ne

kahan tak bojh besakhi ka sari zindagi dhote

utarte hi kanoen mein aj rassi khol di ham ne

farshto tum kahan tak nama-e-aamal dekhoge

chalo ye nekiyan gin lo ke gathri khol di ham ne

tumhara nam aya aur ham takne lage rasta

tumhari yad ai aur khirki khol di ham ne

purane ho chale the zakhm sare arzuon ke

kaho chara garon se aj piti khol di ham ne

tumhare dukh uthae is liye phirte hain muddat se

tumhare nam ai thi jo chitthi khol di ham ne