اچھی سے اچھی آب و ہوا کے بغیر بھی

اچھی سے اچھی آب و ہوا کے بغیر بھی

زندہ ہیں کتنے لوگ دوا کے بغیر بھی

سانسوں کا کاروبار بدن کی ضرورتیں

سب کچھ تو چل رہا ہے دعا کے بغیر بھی

برسوں سے اس مکان میں رہتے ہیں چند لوگ

اک دوسرے کے ساتھ وفا کے بغیر بھی

اب زندگی کا کوئی بھروسہ نہیں رہا

مرنے لگے ہیں لوگ قضا کے بغیر بھی

ہم بے قصور لوگ بھی دلچسپ لوگ ہیں

شرمندہ ہو رہے ہیں خطا کے بغیر بھی

چارہ گری بتائے اگر کچھ علاج ہے

دل ٹوٹنے لگے ہیں صدا کے بغیر بھی

achchhi se achchhi ab-o-hawa ke baghair bhi

zinda hain kitne log dawa ke baghair bhi

sanson ka karobar badan ki zaruraten

sab kuchh to chal raha hai dua ke baghair bhi

barson se is makan mein rahte hain chand log

ik dusre ke sath wafa ke baghair bhi

ab zindagi ka koi bharosa nahin raha

marne lage hain log qaza ke baghair bhi

ham be qusur log bhi dilchasp log hain

sharminda ho rahe hain khata ke baghair bhi

chara giri batae agar kuchh ilaj hai

dil tutne lage hain sada ke baghair bhi