تھکن کو اوڑھ کے بستر میں جا کے لیٹ گئے

تھکن کو اوڑھ کے بستر میں جا کے لیٹ گئے

ہم اپنی قبر مقرر میں جا کے لیٹ گئے

تمام عمر ہم اک دوسرے سے لڑتے رہے

مگر مرے تو برابر میں جا کے لیٹ گئے

ہماری تشنہ نصیبی کا حال مت پوچھو

وہ پیاس تھی کہ سمندر میں جا کے لیٹ گئے

نہ جانے کیسی تھکن تھی کبھی نہیں اتری

چلے جو گھر سے تو دفتر میں جا کے لیٹ گئے

یہ بے وقوف انہیں موت سے ڈراتے ہیں

جو خود ہی سایۂ خنجر میں جا کے لیٹ گئے

تمام عمر جو نکلے نہ تھے حویلی سے

وہ ایک گنبد بے در میں جا کے لیٹ گئے

سجائے پھرتے تھے جھوٹی انا جو چہروں پر

وہ لوگ قصر سکندر میں جا کے لیٹ گئے

سزا ہماری بھی کاٹی ہے بال بچوں نے

کہ ہم اداس ہوئے گھر میں جا کے لیٹ گئے

thakan ko orh ke bistar mein ja ke let gae

ham apni qabr muqarrar mein ja ke let gae

tamam umr ham ik dusre se larte rahe

magar mire to barabar mein ja ke let gae

hamari tishna nasibi ka hal mat puchho

wo pyas thi ke samundar mein ja ke let gae

na jane kaisi thakan thi kabhi nahin utri

chale jo ghar se to daftar mein ja ke let gae

ye be wuquf unhen maut se darate hain

jo khud hi saya-e-khanjar mein ja ke let gae

tamam umr jo nikle na the haweli se

wo ek gumbad-e-be dar mein ja ke let gae

sajae phirte the jhuti ana jo chehron par

wo log qasr-e-sikandar mein ja ke let gae

saza hamari bhi kati hai bal bachchon ne

ke ham udas hue ghar mein ja ke let gae