اچھا ہوا کہ میرا نشہ بھی اتر گیا

اچھا ہوا کہ میرا نشہ بھی اتر گیا

تیری کلائی سے یہ کڑا بھی اتر گیا

وہ مطمئن بہت ہے مرا ساتھ چھوڑ کر

میں بھی ہوں خوش کہ قرض مرا بھی اتر گیا

رخصت کا وقت ہے یوں ہی چہرہ کھلا رہے

میں ٹوٹ جاؤں گا جو ذرا بھی اتر گیا

بیکس کی آرزو میں پریشاں ہے زندگی

اب تو فصیل جاں سے دیا بھی اتر گیا

رو دھو کے وہ بھی ہو گیا خاموش ایک روز

دو چار دن میں رنگ حنا بھی اتر گیا

پانی میں وہ کشش ہے کہ اللہ کی پناہ

رسی کا ہاتھ تھامے گھڑا بھی اتر گیا

وہ مفلسی کے دن بھی گزارے ہیں میں نے جب

چولھے سے خالی ہاتھ توا بھی اتر گیا

سچ بولنے میں نشہ کئی بوتلوں کا تھا

بس یہ ہوا کہ میرا گلا بھی اتر گیا

پہلے بھی بے لباس تھے اتنے مگر نہ تھے

اب جسم سے لباس حیا بھی اتر گیا

achchha hua ke mera nasha bhi utar gaya

teri kalai se ye kara bhi utar gaya

wo mutmain bahut hai mira sath chhor kar

main bhi hun khush ke qarz mira bhi utar gaya

rukhsat ka waqt hai yun hi chehra khula rahe

main tut jaunga jo zara bhi utar gaya

bekas ki arzu mein pareshan hai zindagi

ab to fasil-e-jan se diya bhi utar gaya

ro dho ke wo bhi ho gaya khamosh ek roz

do char din mein rang-e-hina bhi utar gaya

pani mein wo kashish hai ke allah ki panah

rassi ka hath thame ghara bhi utar gaya

wo muflisi ke din bhi guzare hain main ne jab

chulhe se khali hath tawa bhi utar gaya

sach bolne mein nasha kai botalon ka tha

bas ye hua ke mera gila bhi utar gaya

pahle bhi be libas the itne magar na the

ab jism se libas-e-haya bhi utar gaya