بادشاہوں کو سکھایا ہے قلندر ہونا

بادشاہوں کو سکھایا ہے قلندر ہونا

آپ آسان سمجھتے ہیں منور ہونا

ایک آنسو بھی حکومت کے لیے خطرہ ہے

تم نے دیکھا نہیں آنکھوں کا سمندر ہونا

صرف بچوں کی محبت نے قدم روک لیے

ورنہ آسان تھا میرے لیے بے گھر ہونا

ہم کو معلوم ہے شہرت کی بلندی ہم نے

قبر کی مٹی کا دیکھا ہے برابر ہونا

اس کو قسمت کی خرابی ہی کہا جائے گا

آپ کا شہر میں آنا مرا باہر ہونا

سوچتا ہوں تو کہانی کی طرح لگتا ہے

راستے سے مرا تکنا ترا چھت پر ہونا

مجھ کو قسمت ہی پہنچنے نہیں دیتی ورنہ

ایک اعزاز ہے اس در کا گداگر ہونا

صرف تاریخ بتانے کے لیے زندہ ہوں

اب مرا گھر میں بھی ہونا ہے کلنڈر ہونا

badshahon ko sikhaya hai qalandar hona

ap asan samajhte hain munawwar hona

ek ansu bhi hukumat ke liye khatra hai

tum ne dekha nahin ankhon ka samundar hona

sirf bachchon ki mohabbat ne qadam rok liye

warna asan tha mere liye be ghar hona

ham ko maalum hai shohrat ki bulandi ham ne

qabr ki mitti ka dekha hai barabar hona

us ko qismat ki kharabi hi kaha jaega

ap ka shahr mein ana mira bahar hona

sochta hun to kahani ki tarah lagta hai

raste se mira takna tira chhat par hona

mujh ko qismat hi pahunchne nahin deti warna

ek ezaz hai us dar ka gadagar hona

sirf tarikh batane ke liye zinda hun

ab mira ghar mein bhi hona hai kalnidar hona