کسی کو گھر ملا حصے میں یا کوئی دکاں آئی

کسی کو گھر ملا حصے میں یا کوئی دکاں آئی

میں گھر میں سب سے چھوٹا تھا مرے حصے میں ماں آئی

یہاں سے جانے والا لوٹ کر کوئی نہیں آیا

میں روتا رہ گیا لیکن نہ واپس جا کے ماں آئی

ادھورے راستے سے لوٹنا اچھا نہیں ہوتا

بلانے کے لیے دنیا بھی آئی تو کہاں آئی

کسی کو گاؤں سے پردیس لے جائے گی پھر شاید

اڑاتی ریل گاڑی ڈھیر سارا پھر دھواں آئی

مرے بچوں میں ساری عادتیں موجود ہیں میری

تو پھر ان بد نصیبوں کو نہ کیوں اردو زباں آئی

قفس میں موسموں کا کوئی اندازہ نہیں ہوتا

خدا جانے بہار آئی چمن میں یا خزاں آئی

گھروندے تو گھروندے ہیں چٹانیں ٹوٹ جاتی ہیں

اڑانے کے لیے آندھی اگر نام و نشاں آئی

کبھی اے خوش نصیبی میرے گھر کا رخ بھی کر لیتی

ادھر پہنچی ادھر پہنچی یہاں آئی وہاں آئی

kisi ko ghar mila hisse mein ya koi dukan ai

main ghar mein sab se chhota tha mire hisse mein man ai

yahan se jane wala laut kar koi nahin aya

main rota rah gaya lekin na wapas ja ke man ai

adhure raste se lautna achchha nahin hota

bulane ke liye duniya bhi ai to kahan ai

kisi ko gaon se pardes le jaegi phir shayad

urati rel gari dher sara phir dhuan ai

mire bachchon mein sari adaten maujud hain meri

to phir un bad nasibon ko na kyun urdu zaban ai

qafas mein mausamon ka koi andaza nahin hota

khuda jane bahar ai chaman mein ya khizan ai

gharaunde to gharaunde hain chatanen tut jati hain

urane ke liye andhi agar nam-o-nishan ai

kabhi ai khush nasibi mere ghar ka rukh bhi kar leti

idhar pahunchi idhar pahunchi yahan ai wahan ai