کوئی خبر بھی نہ بھیجی بہار نے آتے

کوئی خبر بھی نہ بھیجی بہار نے آتے

کہ ہم بھی قسمت مژگاں سنوارنے آتے

پھر آرزو سے تقاضائے رسم و رہ ہوتا

نگہ پہ قرض تھے جتنے اتارنے آتے

یہ زندگی ہے ہر اک پیرہن میں سجتی ہے

نہیں تھی جیت نصیبوں میں ہارنے آتے

کوئی شرر کوئی خوشبو کہ دل نہ بجھ جائے

کسی بھی نام سے خود کو پکارنے آتے

ابھی یہاں تو نہیں ہو سکی حکایت جاں

نئے ورق پہ نئے نقش ابھارنے آتے

کبھی غبار کبھی نقش پائے راہرواں

وہ رہ گزر تھی کہ ہر روپ دھارنے آتے

مرا سکوں بھی مرے آنسوؤں کے بس میں تھا

یہ میہماں مری دنیا نکھارنے آتے

جو ہم نہیں تو سر رہ گزار درد اداؔ

وہ کون تھے جو دل و جاں کو وارنے آتے

koi khabar bhi na bheji bahar ne ate

ke ham bhi qismat mizhgan sanwarne ate

phir arzu se taqaza-e-rasm-o-rah hota

nigah pe qarz the jitne utarne ate

ye zindagi hai har ik pairahan mein sajti hai

nahin thi jit nasibon mein harne ate

koi sharar koi khushbu ke dil na bujh jae

kisi bhi nam se khud ko pukarne ate

abhi yahan to nahin ho saki hikayat jan

nae waraq pe nae naqsh ubharne ate

kabhi ghubar kabhi naqsh-e-pae rahrawan

wo rah guzar thi ke har rup dharne ate

mira sukun bhi mire ansuon ke bas mein tha

ye mehman miri duniya nikharne ate

jo ham nahin to sar-e-rah guzar dard ada

wo kaun the jo dil-o-jan ko warne ate