زباں کو حکم نگاہ کرم کو پہچانے

زباں کو حکم نگاہ کرم کو پہچانے

نگہ کا جرم غبار الم کو پہچانے

وہ ایک جام کہاں ہر کسی کی قسمت میں

وہ ایک ظرف کہ اعجاز‌ سم کو پہچانے

متاع درد پرکھنا تو بس کی بات نہیں

جو تجھ کو دیکھ کے آئے وہ ہم کو پہچانے

وہ دل جو خاک ہوئے آج تک دھڑکتے ہیں

رہ وفا ترے معجز رقم کو پہچانے

سحر سے پہلے یہاں آفتاب ابھرے ہیں

خلوص بندگیٔ چشم نم کو پہچانے

یہ خود فریب اجالے یہ ہاتھ ہاتھ دیئے

دیئے بجھاؤ کہ انسان غم کو پہچانے

کسی خیال کا سایہ کسی امید کی دھوپ

کوئی تو آئے کہ دل کیف و کم کو پہچانے

ہزار کوس نگاہوں سے دل کی منزل تک

کوئی قریب سے دیکھے تو ہم کو پہچانے

جو ہم سفر بھی رہے ہیں شریک منزل بھی

کچھ اجنبی تو نہ تھے پھر بھی کم کو پہچانے

بہت دنوں تو ہواؤں کا ہم نے رخ دیکھا

بڑے دنوں میں متاع قلم کو پہچانے

zaban ko hukm nigah-e-karam ko pahchane

nigah ka jurm ghubar-e-alam ko pahchane

wo ek jam kahan har kisi ki qismat mein

wo ek zarf ke ejaz sam ko pahchane

mata-e-dard parakhna to bas ki bat nahin

jo tujh ko dekh ke ae wo ham ko pahchane

wo dil jo khak hue aj tak dharakte hain

rah-e-wafa tire mojiz raqam ko pahchane

sahar se pahle yahan aftab ubhre hain

khulus-e-bandagi-e-chashm-e-nam ko pahchane

ye khud fareb ujale ye hath hath diye

diye bujhao ke insan gham ko pahchane

kisi khayal ka saya kisi umid ki dhup

koi to ae ke dil kaif-o-kam ko pahchane

hazar kos nigahon se dil ki manzil tak

koi qarib se dekhe to ham ko pahchane

jo ham safar bhi rahe hain sharik-e-manzil bhi

kuchh ajnabi to na the phir bhi kam ko pahchane

bahut dinon to hawaon ka ham ne rukh dekha

bare dinon mein mata-e-qalam ko pahchane