شاید ابھی ہے راکھ میں کوئی شرار بھی

شاید ابھی ہے راکھ میں کوئی شرار بھی

کیوں ورنہ انتظار بھی ہے اضطرار بھی

دھیان آ گیا تھا مرگ دل نامراد کا

ملنے کو مل گیا ہے سکوں بھی قرار بھی

اب ڈھونڈنے چلے ہو مسافر کو دوستو

حد نگاہ تک نہ رہا جب غبار بھی

ہر آستاں پہ ناصیہ فرسا ہیں آج وہ

جو کل نہ کر سکے تھے تیرا انتظار بھی

اک راہ رک گئی تو ٹھٹک کیوں گئیں اداؔ

آباد بستیاں ہیں پہاڑوں کے پار بھی

shayad abhi hai rakh mein koi sharar bhi

kyun warna intizar bhi hai iztirar bhi

dhyan a gaya tha marg dil-e-namurad ka

milne ko mil gaya hai sukun bhi qarar bhi

ab dhundne chale ho musafir ko dosto

had-e-nigah tak na raha jab ghubar bhi

har astan pe nasiya farsa hain aj wo

jo kal na kar sake the tera intizar bhi

ik rah ruk gai to thitak kyun gain ada

abad bastiyan hain paharon ke par bhi