Arooz is now on the App Store, for iPhone and iPad. Download →

All poetry

نہ بام و دشت نہ دریا نہ کوہسار ملے

Ada Jafri (1924–2015)

نہ بام و دشت نہ دریا نہ کوہسار ملے

جنوں کی راہ تھی حالات سازگار ملے

لبوں پہ حرف شکایت بھی آ کے ٹوٹ گیا

وہ خود فگار تھے جو ہاتھ سنگ بار ملے

ادھر فصیل شب غم ادھر ہے شہر پناہ

صبا سے کہیو وہیں آ کے ایک بار ملے

یہ بے بسی تو مرے عہد کا مقدر تھی

دلوں کو داغ تمنا بھی مستعار ملے

ہتھیلیوں پہ چراغ دعا سجائے ہوئے

ملے نگار بہاراں تو شرمسار ملے

کوئی تو راہ تمنا میں ہم سفر ہوتا

کوئی تو کوئے وفا میں خطا شعار ملے

محبتوں سے تو پہلے ہی کیا توقع تھی

مروتوں کے بھی دامان تار تار ملے

میں کیسے اپنے خد و خال آج پہچانوں

جو آئینہ ملے آلودۂ غبار ملے

مری طلب کی یہ معراج ہے کہ عجز اداؔ

جدھر سے گزروں وہی ایک رہ گزار ملے