آنکھوں میں روپ صبح کی پہلی کرن سا ہے

آنکھوں میں روپ صبح کی پہلی کرن سا ہے

احوال جی کا زلف شکن در شکن سا ہے

کچھ یادگار اپنی مگر چھوڑ کر گئیں

جاتی رتوں کا حال دلوں کی لگن سا ہے

آنکھیں برس گئیں تو نکھار اور آ گیا

یادوں کا رنگ بھی تو گل و یاسمن سا ہے

کس موڑ پر ہیں آج ہم اے رہ گزار ناز

اب درد کا مزاج کسی ہم سخن سا ہے

ہے اب بھی رنگ رنگ تمنا کا پیرہن

خوابوں کے ساتھ اب بھی وہی حسن ظن سا ہے

کن منزلوں لٹے ہیں محبت کے قافلے

انساں زمیں پہ آج غریب الوطن سا ہے

وہ جس کا ساتھ چھوڑ چکا ناز آگہی

اب بھی تلاش رہ میں وہی راہزن سا ہے

شاخوں کا رنگ روپ خزاں لے گئی مگر

انداز آج بھی وہی ارباب فن سا ہے

خوشبو کے تھامنے کو بڑھائے ہیں ہاتھ اداؔ

دامان آرزو بھی صبا پیرہن سا ہے

ankhon mein rup subh ki pahli kiran sa hai

ahwal ji ka zulf-e-shikan dar shikan sa hai

kuchh yadgar apni magar chhor kar gain

jati ruton ka hal dilon ki lagan sa hai

ankhen baras gain to nikhar aur a gaya

yadon ka rang bhi to gul-o-yasaman sa hai

kis mor par hain aj ham ai rah guzar-e-naz

ab dard ka mizaj kisi ham sukhan sa hai

hai ab bhi rang rang-e-tamanna ka pairahan

khwabon ke sath ab bhi wahi husn-e-zan sa hai

kin manzilon lute hain mohabbat ke qafile

insan zamin pe aj gharib alwatan sa hai

wo jis ka sath chhor chuka naz agahi

ab bhi talash rah mein wahi rahzan sa hai

shakhon ka rang rup khizan le gai magar

andaz aj bhi wahi arbab-e-fan sa hai

khushbu ke thamne ko barhae hain hath ada

daman-e-arzu bhi saba pairahan sa hai