مجھے رنگ خواب سے زندگی کا یقیں ملا

مجھے رنگ خواب سے زندگی کا یقیں ملا

کبھی دل دکھا تو کچھ اور بھی وہ قریں ملا

کوئی قصہ ہجر و وصال کا نہ سنا مجھے

جو حریم درد تک آ گیا سو وہیں ملا

سر خواب ہی کبھی تم بھی تو مجھے دیکھتے

وہ طلسم تھا کہ فلک بھی زیر نگیں ملا

اسی آئنہ سے ملیں گی میری گواہیاں

تمہیں عکس میرا جس آئنہ میں نہیں ملا

کہیں نقش پا کوئی موج رنگ نہیں تھی میں

میں وہ سوچ ہوں جسے اعتبار جبیں ملا

مری زندگی کڑی دھوپ میں تو کٹی مگر

مری چھاؤں سا کوئی سائباں بھی کہیں ملا

ہوا یوں کہ پھر مجھے زندگی نے بسر کیا

کوئی دن تھے جب مجھے ہر نظارہ حسیں ملا

mujhe rang khwab se zindagi ka yaqin mila

kabhi dil dikha to kuchh aur bhi wo qarin mila

koi qissa hijr-o-wisal ka na suna mujhe

jo harim-e-dard tak a gaya so wahin mila

sar-e-khwab hi kabhi tum bhi to mujhe dekhte

wo tilism tha ke falak bhi zer-e-nagin mila

isi aina se milengi meri gawahiyan

tumhen aks mera jis aina mein nahin mila

kahin naqsh-e-pa koi mauj-e-rang nahin thi main

main wo soch hun jise etibar jabin mila

miri zindagi kari dhup mein to kati magar

miri chhaon sa koi saiban bhi kahin mila

hawa yun ke phir mujhe zindagi ne basar kiya

koi din the jab mujhe har nazara hasin mila