گلوں سی گفتگو کریں قیامتوں کے درمیاں

گلوں سی گفتگو کریں قیامتوں کے درمیاں

ہم ایسے لوگ اب ملیں حکایتوں کے درمیاں

لہولہان انگلیاں ہیں اور چپ کھڑی ہوں میں

گل و سمن کی بے پناہ چاہتوں کے درمیاں

ہتھیلیوں کی اوٹ ہی چراغ لے چلوں ابھی

ابھی سحر کا ذکر ہے روایتوں کے درمیاں

جو دل میں تھی نگاہ سی نگاہ میں کرن سی تھی

وہ داستاں الجھ گئی وضاحتوں کے درمیاں

صحیفۂ حیات میں جہاں جہاں لکھی گئی

لکھی گئی حدیث جاں جراحتوں کے درمیاں

کوئی نگر کوئی گلی شجر کی چھاؤں ہی سہی

یہ زندگی نہ کٹ سکے مسافتوں کے درمیاں

اب اس کے خال و خد کا رنگ مجھ سے پوچھنا عبث

نگہ جھپک جھپک گئی ارادتوں کے درمیاں

صبا کا ہاتھ تھام کر اداؔ نہ چل سکوگی تم

تمام عمر خواب خواب ساعتوں کے درمیاں

gulon si guftugu karen qayamaton ke darmiyan

ham aise log ab milen hikayaton ke darmiyan

lahuluhan ungliyan hain aur chup khari hun main

gul-o-saman ki be panah chahaton ke darmiyan

hatheliyon ki ot hi charagh le chalun abhi

abhi sahar ka zikr hai riwayaton ke darmiyan

jo dil mein thi nigah si nigah mein kiran si thi

wo dastan ulajh gai wazahton ke darmiyan

sahifa-e-hayat mein jahan jahan likhi gai

likhi gai hadis-e-jan jarahton ke darmiyan

koi nagar koi gali shajar ki chhaon hi sahi

ye zindagi na kat sake masafaton ke darmiyan

ab us ke khal-o-khad ka rang mujh se puchhna abas

nigah jhapak jhapak gai iradaton ke darmiyan

saba ka hath tham kar ada na chal sakogi tum

tamam umr khwab khwab saaton ke darmiyan