دیپ تھا یا تارا کیا جانے

دیپ تھا یا تارا کیا جانے

دل میں کیوں ڈوبا کیا جانے

گل پر کیا کچھ بیت گئی ہے

البیلا جھونکا کیا جانے

آس کی میلی چادر اوڑھے

وہ بھی تھا مجھ سا کیا جانے

ریت بھی اپنی رت بھی اپنی

دل رسم دنیا کیا جانے

انگلی تھام کے چلنے والا

نگری کا رستا کیا جانے

کتنے موڑ ابھی باقی ہیں

تم جانو سایا کیا جانے

کون کھلونا ٹوٹ گیا ہے

بالک بے پروا کیا جانے

ممتا اوٹ دہکتے سورج

آنکھوں کا تارا کیا جانے

dip tha ya tara kya jane

dil mein kyun duba kya jane

gul par kya kuchh bit gai hai

albela jhonka kya jane

as ki maili chadar orhe

wo bhi tha mujh sa kya jane

ret bhi apni rut bhi apni

dil rasm-e-duniya kya jane

ungli tham ke chalne wala

nagri ka rasta kya jane

kitne mor abhi baqi hain

tum jano saya kya jane

kaun khilauna tut gaya hai

balak be parwa kya jane

mamta ot dahakte suraj

ankhon ka tara kya jane