آخری ٹیس آزمانے کو

آخری ٹیس آزمانے کو

جی تو چاہا تھا مسکرانے کو

یاد اتنی بھی سخت جاں تو نہیں

اک گھروندا رہا ہے ڈھانے کو

سنگریزوں میں ڈھل گئے آنسو

لوگ ہنستے رہے دکھانے کو

زخم نغمہ بھی لو تو دیتا ہے

اک دیا رہ گیا جلانے کو

جلنے والے تو جل بجھے آخر

کون دیتا خبر زمانے کو

کتنے مجبور ہو گئے ہوں گے

ان کہی بات منہ پہ لانے کو

کھل کے ہنسنا تو سب کو آتا ہے

لوگ ترسے ہیں اک بہانے کو

ریزہ ریزہ بکھر گیا انساں

دل کی ویرانیاں جتانے کو

حسرتوں کی پناہ گاہوں میں

کیا ٹھکانے ہیں سر چھپانے کو

ہاتھ کانٹوں سے کر لیے زخمی

پھول بالوں میں اک سجانے کو

آس کی بات ہو کہ سانس اداؔ

یہ کھلونے تھے ٹوٹ جانے کو

akhiri tis azmane ko

ji to chaha tha muskurane ko

yad itni bhi sakht jan to nahin

ik gharaunda raha hai dhane ko

sangrezon mein dhal gae ansu

log hanste rahe dikhane ko

zakhm naghma bhi lo to deta hai

ik diya rah gaya jalane ko

jalne wale to jal bujhe akhir

kaun deta khabar zamane ko

kitne majbur ho gae honge

an kahi bat munh pe lane ko

khul ke hansna to sab ko ata hai

log tarse hain ik bahane ko

reza reza bikhar gaya insan

dil ki wiraniyan jatane ko

hasraton ki panah gahon mein

kya thikane hain sar chhupane ko

hath kanton se kar liye zakhmi

phul balon mein ik sajane ko

as ki bat ho ke sans ada

ye khilaune the tut jane ko