شام نے جب پلکوں پہ آتش دان لیا

شام نے جب پلکوں پہ آتش دان لیا

کچھ یادوں نے چٹکی میں لوبان لیا

دروازوں نے اپنی آنکھیں نم کر لیں

دیواروں نے اپنا سینہ تان لیا

پیاس تو اپنی سات سمندر جیسی تھی

ناحق ہم نے بارش کا احسان لیا

میں نے تلووں سے باندھی تھی چھاؤں مگر

شاید مجھ کو سورج نے پہچان لیا

کتنے سکھ سے دھرتی اوڑھ کے سوئے ہیں

ہم نے اپنی ماں کا کہنا مان لیا

sham ne jab palkon pe atish dan liya

kuchh yadon ne chutki mein loban liya

darwazon ne apni ankhen nam kar len

diwaron ne apna sina tan liya

pyas to apni sat samundar jaisi thi

nahaq ham ne barish ka ehsan liya

main ne talwon se bandhi thi chhaon magar

shayad mujh ko suraj ne pahchan liya

kitne sukh se dharti orh ke soe hain

ham ne apni man ka kahna man liya