سر پر سات آکاش زمیں پر سات سمندر بکھرے ہیں

سر پر سات آکاش زمیں پر سات سمندر بکھرے ہیں

آنکھیں چھوٹی پڑ جاتی ہیں اتنے منظر بکھرے ہیں

زندہ رہنا کھیل نہیں ہے اس آباد خرابے میں

وہ بھی اکثر ٹوٹ گیا ہے ہم بھی اکثر بکھرے ہیں

اس بستی کے لوگوں سے جب باتیں کیں تو یہ جانا

دنیا بھر کو جوڑنے والے اندر اندر بکھرے ہیں

ان راتوں سے اپنا رشتہ جانے کیسا رشتہ ہے

نیندیں کمروں میں جاگی ہیں خواب چھتوں پر بکھرے ہیں

آنگن کے معصوم شجر نے ایک کہانی لکھی ہے

اتنے پھل شاخوں پہ نہیں تھے جتنے پتھر بکھرے ہیں

ساری دھرتی سارے موسم ایک ہی جیسے لگتے ہیں

آنکھوں آنکھوں قید ہوئے تھے منظر منظر بکھرے ہیں

sar par sat akash zamin par sat samundar bikhre hain

ankhen chhoti par jati hain itne manzar bikhre hain

zinda rahna khel nahin hai is abad kharabe mein

wo bhi aksar tut gaya hai ham bhi aksar bikhre hain

is basti ke logon se jab baten kin to ye jana

duniya bhar ko jorne wale andar andar bikhre hain

in raton se apna rishta jane kaisa rishta hai

ninden kamron mein jagi hain khwab chhaton par bikhre hain

angan ke maasum shajar ne ek kahani likhi hai

itne phal shakhon pe nahin the jitne patthar bikhre hain

sari dharti sare mausam ek hi jaise lagte hain

ankhon ankhon qaid hue the manzar manzar bikhre hain