شجر ہیں اب ثمر آثار میرے

شجر ہیں اب ثمر آثار میرے

چلے آتے ہیں دعویدار میرے

مہاجر ہیں نہ اب انصار میرے

مخالف ہیں بہت اس بار میرے

یہاں اک بوند کا محتاج ہوں میں

سمندر ہیں سمندر پار میرے

ابھی مردوں میں روحیں پھونک ڈالیں

اگر چاہیں تو یہ بیمار میرے

ہوائیں اوڑھ کر سویا تھا دشمن

گئے بے کار سارے وار میرے

میں آ کر دشمنوں میں بس گیا ہوں

یہاں ہمدرد ہیں دو چار میرے

ہنسی میں ٹال دینا تھا مجھے بھی

خفا کیوں ہو گئے سرکار میرے

تصور میں نہ جانے کون آیا

مہک اٹھے در و دیوار میرے

تمہارا نام دنیا جانتی ہے

بہت رسوا ہیں اب اشعار میرے

بھنور میں رک گئی ہے ناؤ میری

کنارے رہ گئے اس پار میرے

میں خود اپنی حفاظت کر رہا ہوں

ابھی سوئے ہیں پہرے دار میرے

shajar hain ab samar asar mere

chale ate hain daawedar mere

muhajir hain na ab ansar mere

mukhalif hain bahut is bar mere

yahan ik bund ka mohtaj hun main

samundar hain samundar par mere

abhi mardon mein ruhen phunk dalen

agar chahen to ye bimar mere

hawaen orh kar soya tha dushman

gae be kar sare war mere

main a kar dushmanon mein bas gaya hun

yahan hamdard hain do char mere

hansi mein tal dena tha mujhe bhi

khafa kyun ho gae sarkar mere

tasawwur mein na jane kaun aya

mahak uthe dar-o-diwar mere

tumhara nam duniya janti hai

bahut ruswa hain ab ashar mere

bhanwar mein ruk gai hai nao meri

kinare rah gae us par mere

main khud apni hifazat kar raha hun

abhi soe hain pahre dar mere