جب کبھی پھولوں نے خوشبو کی تجارت کی ہے

جب کبھی پھولوں نے خوشبو کی تجارت کی ہے

پتی پتی نے ہواؤں سے شکایت کی ہے

یوں لگا جیسے کوئی عطر فضا میں گھل جائے

جب کسی بچے نے قرآں کی تلاوت کی ہے

جا نمازوں کی طرح نور میں اجلائی سحر

رات بھر جیسے فرشتوں نے عبادت کی ہے

سر اٹھائے تھیں بہت سرخ ہوا میں پھر بھی

ہم نے پلکوں کے چراغوں کی حفاظت کی ہے

مجھے طوفان حوادث سے ڈرانے والو

حادثوں نے تو مرے ہاتھ پہ بیعت کی ہے

آج اک دانۂ گندم کے بھی حق دار نہیں

ہم نے صدیوں انہیں کھیتوں پہ حکومت کی ہے

یہ ضروری تھا کہ ہم دیکھتے قلعوں کے جلال

عمر بھر ہم نے مزاروں کی زیارت کی ہے

jab kabhi phulon ne khushbu ki tijarat ki hai

patti patti ne hawaon se shikayat ki hai

yun laga jaise koi itr faza mein ghul jae

jab kisi bachche ne quran ki tilawat ki hai

ja namazon ki tarah nur mein ujlai sahar

rat bhar jaise farishton ne ibadat ki hai

sar uthae thin bahut surkh hawa mein phir bhi

ham ne palkon ke charaghon ki hifazat ki hai

mujhe tufan-e-hawadis se darane walo

hadson ne to mire hath pe baiat ki hai

aj ik dana-e-gandum ke bhi haq dar nahin

ham ne sadiyon unhen kheton pe hukumat ki hai

ye zaruri tha ke ham dekhte qilon ke jalal

umr bhar ham ne mazaron ki ziyarat ki hai