صرف سچ اور جھوٹ کی میزان میں رکھے رہے

صرف سچ اور جھوٹ کی میزان میں رکھے رہے

ہم بہادر تھے مگر میدان میں رکھے رہے

جگنوؤں نے پھر اندھیروں سے لڑائی جیت لی

چاند سورج گھر کے روشندان میں رکھے رہے

دھیرے دھیرے ساری کرنیں خودکشی کرنے لگیں

ہم صحیفہ تھے مگر جزدان میں رکھے رہے

بند کمرے کھول کر سچائیاں رہنے لگیں

خواب کچی دھوپ تھے دالان میں رکھے رہے

صرف اتنا فاصلہ ہے زندگی سے موت کا

شاخ سے توڑے گئے گلدان میں رکھے رہے

زندگی بھر اپنی گونگی دھڑکنوں کے ساتھ ساتھ

ہم بھی گھر کے قیمتی سامان میں رکھے رہے

sirf sach aur jhut ki mizan mein rakhe rahe

ham bahadur the magar maidan mein rakhe rahe

jugnuon ne phir andheron se larai jit li

chand suraj ghar ke raushandan mein rakhe rahe

dhire dhire sari kirnen khudkushi karne lagen

ham sahifa the magar juzdan mein rakhe rahe

band kamre khol kar sachchaiyan rahne lagen

khwab kachchi dhup the dalan mein rakhe rahe

sirf itna fasla hai zindagi se maut ka

shakh se tore gae guldan mein rakhe rahe

zindagi bhar apni gungi dharkanon ke sath sath

ham bhi ghar ke qimti saman mein rakhe rahe