خواب کی حالتوں کے ساتھ تیری حکایتوں میں ہیں

خواب کی حالتوں کے ساتھ تیری حکایتوں میں ہیں

ہم بھی دیار اہل دل تیری روایتوں میں ہیں

وہ جو تھے رشتہ ہائے جاں، ٹوٹ سکے بھلا کہاں

جان وہ رشتہ ہائے جاں اب بھی شکایتوں میں ہیں

ایک غبار ہے کہ ہے دائرہ وار پر فشاں

قافلہ ہائے کہکشاں تنگ ہیں وحشتوں میں ہیں

وقت کی درمیانیاں کر گئیں جاں کنی کو جاں

وہ جو عداوتیں کہ تھیں آج محبتوں میں ہیں

پرتو رنگ ہے کہ ہے دید میں جانشین رنگ

رنگ کہاں ہیں رونما رنگ تو نکہتوں میں ہیں

ہے یہ وجود کی نمود اپنی نفس نفس گریز

وقت کی ساری بستیاں، اپنی ہزیمتوں میں ہیں

گرد کا سارا خانماں ہے سر دشت بے اماں

شہر ہیں وہ جو ہر طرح گرد کی خدمتوں میں ہیں

وہ دل و جان صورتیں جیسے کبھی نہ تھیں کہیں

ہم انہیں صورتوں کے ہیں ہم انہیں صورتوں میں ہیں

میں نہ سنوں گا ماجرا معرکہ ہائے شوق کا

خون گئے ہیں رائیگاں رنگ ندامتوں میں ہیں

khwab ki halaton ke sath teri hikayaton mein hain

ham bhi dayar-e-ahl-e-dil teri riwayaton mein hain

wo jo the rishta hae jan, tut sake bhala kahan

jan wo rishta hae jan ab bhi shikayaton mein hain

ek ghubar hai ke hai daira war par fishan

qafila ha-e-kahkashan tang hain wahshaton mein hain

waqt ki darmiyaniyan kar gain jan kini ko jan

wo jo adawaten ke thin aj mohabbaton mein hain

partau rang hai ke hai did mein janishin rang

rang kahan hain runuma rang to nikhaton mein hain

hai ye wajud ki numud apni nafas nafas gurez

waqt ki sari bastiyan, apni hazemton mein hain

gard ka sara khanuman hai sar-e-dasht-e-be aman

shahr hain wo jo har tarah gard ki khidmaton mein hain

wo dil-o-jan suraten jaise kabhi na thin kahin

ham unhen suraton ke hain ham unhen suraton mein hain

main na sununga majra marka ha-e-shauq ka

khun gae hain raigan rang nadamaton mein hain