Arooz is now on the App Store, for iPhone and iPad. Download →

All poetry

کیا ہو گیا ہے گیسوئے خم دار کو ترے

Jaun Elia (1931–2002)

کیا ہو گیا ہے گیسوئے خم دار کو ترے

آزاد کر رہے ہیں گرفتار کو ترے

اب تو ہے مدتوں سے شب و روز روبرو

کتنے ہی دن گزر گئے دیدار کو ترے

کل رات چوب دار سمیت آ کے لے گیا

اک غول طرحدار سر دار کو ترے

اب اتنی کند ہو گئی دھار اے یقیں تری

اب روکتا نہیں ہے کوئی وار کو ترے

اب رشتۂ مریض و مسیحا ہوا ہے خوار

سب پیشہ ور سمجھتے ہیں بیمار کو ترے

باہر نکل کے آ در و دیوار ذات سے

لے جائے گی ہوا در و دیوار کو ترے

اے رنگ اس میں سود ہے تیرا زیاں نہیں

خوشبو اڑا کے لے گئی زنگار کو ترے