دل کا دیار خواب میں دور تلک گزر رہا

دل کا دیار خواب میں دور تلک گزر رہا

پاؤں نہیں تھے درمیاں آج بڑا سفر رہا

ہو نہ سکا ہمیں کبھی اپنا خیال تک نصیب

نقش کسی خیال کا لوح خیال پر رہا

نقش گروں سے چاہیے نقش و نگار کا حساب

رنگ کی بات مت کرو رنگ بہت بکھر رہا

جانے گماں کی وہ گلی ایسی جگہ ہے کون سی

دیکھ رہے ہو تم کہ میں پھر وہیں جا کے مر رہا

دل مرے دل مجھے بھی تم اپنے خواص میں رکھو

یاراں تمہارے باب میں میں ہی نہ معتبر رہا

شہر فراق یار سے آئی ہے اک خبر مجھے

کوچۂ یاد یار سے کوئی نہیں ابھر رہا

dil ka dayar-e-khwab mein dur talak guzar raha

paon nahin the darmiyan aj bara safar raha

ho na saka hamen kabhi apna khayal tak nasib

naqsh kisi khayal ka lauh-e-khayal par raha

naqsh garon se chahiye naqsh-o-nigar ka hisab

rang ki bat mat karo rang bahut bikhar raha

jane guman ki wo gali aisi jagah hai kaun si

dekh rahe ho tum ke main phir wahin ja ke mar raha

dil mire dil mujhe bhi tum apne khawas mein rakho

yaran tumhare bab mein main hi na motabar raha

shahr-e-firaq-e-yar se ai hai ik khabar mujhe

kucha-e-yad-e-yar se koi nahin ubhar raha