کسی سے کوئی خفا بھی نہیں رہا اب تو

کسی سے کوئی خفا بھی نہیں رہا اب تو

گلا کرو کہ گلا بھی نہیں رہا اب تو

وہ کاہشیں ہیں کہ عیش جنوں تو کیا یعنی

غرور ذہن رسا بھی نہیں رہا اب تو

شکست ذات کا اقرار اور کیا ہوگا

کہ ادعائے وفا بھی نہیں رہا اب تو

چنے ہوئے ہیں لبوں پر ترے ہزار جواب

شکایتوں کا مزہ بھی نہیں رہا اب تو

ہوں مبتلائے یقیں میری مشکلیں مت پوچھ

گمان عقدہ کشا بھی نہیں رہا اب تو

مرے وجود کا اب کیا سوال ہے یعنی

میں اپنے حق میں برا بھی نہیں رہا اب تو

یہی عطیۂ صبح شب وصال ہے کیا

کہ سحر ناز و ادا بھی نہیں رہا اب تو

یقین کر جو تری آرزو میں تھا پہلے

وہ لطف تیرے سوا بھی نہیں رہا اب تو

وہ سکھ وہاں کہ خدا کی ہیں بخششیں کیا کیا

یہاں یہ دکھ کہ خدا بھی نہیں رہا اب تو

kisi se koi khafa bhi nahin raha ab to

gila karo ke gila bhi nahin raha ab to

wo kahishen hain ke aish-e-junun to kya yaani

ghurur-e-zehn-e-rasa bhi nahin raha ab to

shikast-e-zat ka iqrar aur kya hoga

ke iddia-e-wafa bhi nahin raha ab to

chune hue hain labon par tire hazar jawab

shikayaton ka maza bhi nahin raha ab to

hun mubtala-e-yaqin meri mushkilen mat puchh

guman-e-uqda kusha bhi nahin raha ab to

mire wajud ka ab kya sawal hai yaani

main apne haq mein bura bhi nahin raha ab to

yahi atiya-e-subh-e-shab-e-wisal hai kya

ke sehr naz-o-ada bhi nahin raha ab to

yaqin kar jo tiri arzu mein tha pahle

wo lutf tere siwa bhi nahin raha ab to

wo sukh wahan ke khuda ki hain bakhshishen kya kiya

yahan ye dukh ke khuda bhi nahin raha ab to