گفتگو جب محال کی ہوگی

گفتگو جب محال کی ہوگی

بات اس کی مثال کی ہوگی

زندگی ہے خیال کی اک بات

جو کسی بے خیال کی ہوگی

تھی جو خوشبو صبا کی چادر میں

وہ تمہاری ہی شال کی ہوگی

نہ سمجھ پائیں گے وہ اہل فراق

جو اذیت وصال کی ہوگی

دل پہ طاری ہے اک کمال خوشی

شاید اپنے زوال کی ہوگی

جو عطا ہو وصال جاناں کی

وہ اداسی کمال کی ہوگی

آج کہنا ہے دل کو حال اپنا

آج تو سب کے حال کی ہوگی

ہو چکا میں سو فکر یاروں کو

اب مری دیکھ بھال کی ہوگی

اب خلش کیا فراق کی اس کے

اک خلش ماہ و سال کی ہوگی

کفر و ایماں کہا گیا جس کو

بات وہ خد و خال کی ہوگی

جونؔ دل کے ختن میں آیا ہے

ہر غزل اک غزال کی ہوگی

کب بھلا آئے گی جواب کو راس

جو بھی حالت سوال کی ہوگی

guftugu jab muhal ki hogi

bat us ki misal ki hogi

zindagi hai khayal ki ik bat

jo kisi be khayal ki hogi

thi jo khushbu saba ki chadar mein

wo tumhari hi shal ki hogi

na samajh paenge wo ahl-e-firaq

jo aziyyat wisal ki hogi

dil pe tari hai ik kamal khushi

shayad apne zawal ki hogi

jo ata ho wisal janan ki

wo udasi kamal ki hogi

aj kahna hai dil ko hal apna

aj to sab ke hal ki hogi

ho chuka mein so fikr yaron ko

ab miri dekh bhal ki hogi

ab khalish kya firaq ki us ke

ik khalish mah-o-sal ki hogi

kufr-o-iman kaha gaya jis ko

bat wo khad-o-khal ki hogi

jon dil ke khutan mein aya hai

har ghazal ik ghazal ki hogi

kab bhala aegi jawab ko ras

jo bhi halat sawal ki hogi