دل برباد کو آباد کیا ہے میں نے

دل برباد کو آباد کیا ہے میں نے

آج مدت میں تمہیں یاد کیا ہے میں نے

ذوق پرواز تب و تاب عطا فرما کر

صید کو لائق صیاد کیا ہے میں نے

تلخیٔ دور گزشتہ کا تصور کر کے

دل کو پھر مائل فریاد کیا ہے میں نے

آج اس سوز تصور کی خوشی میں اے دوست

طائر صبر کو آزاد کیا ہے میں نے

ہو کے اصرار غم تازہ سے مجبور فغاں

چشم کو اشک تر امداد کیا ہے میں نے

تم جسے کہتے تھے ہنگامہ پسندی میری

پھر وہی طرز غم ایجاد کیا ہے میں نے

پھر گوارا ہے مجھے عشق کی ہر اک مشکل

تازہ پھر شیوۂ فرہاد کیا ہے میں نے

dil-e-barbad ko abad kya hai main ne

aj muddat mein tumhen yad kya hai main ne

zauq-e-parwaz tab-o-tab ata farma kar

said ko laiq-e-sayyad kya hai main ne

talkhi-e-dur guzishta ka tasawwur kar ke

dil ko phir mail-e-fariyad kya hai main ne

aj is soz-e-tasawwur ki khushi mein ai dost

tair-e-sabr ko azad kya hai main ne

ho ke israr gham-e-taza se majbur-e-fughan

chashm ko ashk tar imdad kya hai main ne

tum jise kahte the hangama pasandi meri

phir wahi tarz-e-gham ijad kya hai main ne

phir gawara hai mujhe ishq ki har ik mushkil

taza phir shewa-e-farhad kya hai main ne