کب اس کا وصال چاہیے تھا

کب اس کا وصال چاہیے تھا

بس ایک خیال چاہیے تھا

کب دل کو جواب سے غرض تھی

ہونٹوں کو سوال چاہیے تھا

شوق ایک نفس تھا اور وفا کو

پاس مہ و سال چاہیے تھا

اک چہرۂ سادہ تھا جو ہم کو

بے مثل و مثال چاہیے تھا

اک کرب میں ذات و زندگی ہیں

ممکن کو محال چاہیے تھا

میں کیا ہوں بس اک ملال ماضی

اس شخص کو حال چاہیے تھا

ہم تم جو بچھڑ گئے ہیں ہم کو

کچھ دن تو ملال چاہیے تھا

وہ جسم جمال تھا سراپا

اور مجھ کو جمال چاہیے تھا

وہ شوخ رمیدہ مجھ کو اپنی

بانہوں میں نڈھال چاہیے تھا

تھا وہ جو کمال شوق وصلت

خواہش کو زوال چاہیے تھا

جو لمحہ بہ لمحہ مل رہا ہے

وہ سال بہ سال چاہیے تھا

kab us ka wisal chahiye tha

bas ek khayal chahiye tha

kab dil ko jawab se gharaz thi

honton ko sawal chahiye tha

shauq ek nafas tha aur wafa ko

pas-e-mah-o-sal chahiye tha

ik chehra-e-sada tha jo ham ko

be misl-o-misal chahiye tha

ik karb mein zat-o-zindagi hain

mumkin ko muhal chahiye tha

main kya hun bas ik malal-e-mazi

us shakhs ko hal chahiye tha

ham tum jo bichhar gae hain ham ko

kuchh din to malal chahiye tha

wo jism jamal tha sarapa

aur mujh ko jamal chahiye tha

wo shokh ramida mujh ko apni

banhon mein nidhal chahiye tha

tha wo jo kamal-e-shauq-e-waslat

khwahish ko zawal chahiye tha

jo lamha ba lamha mil raha hai

wo sal ba sal chahiye tha