خون تھوکے گی زندگی کب تک

خون تھوکے گی زندگی کب تک

یاد آئے گی اب تری کب تک

جانے والوں سے پوچھنا یہ صبا

رہے آباد دل گلی کب تک

ہو کبھی تو شراب وصل نصیب

پیے جاؤں میں خون ہی کب تک

دل نے جو عمر بھر کمائی ہے

وہ دکھن دل سے جائے گی کب تک

جس میں تھا سوز آرزو اس کا

شب غم وہ ہوا چلی کب تک

بنی آدم کی زندگی ہے عذاب

یہ خدا کو رلائے گی کب تک

حادثہ زندگی ہے آدم کی

ساتھ دے گی بھلا خوشی کب تک

ہے جہنم جو یاد اب اس کی

وہ بہشت وجود تھی کب تک

وہ صبا اس کے بن جو آئی تھی

وہ اسے پوچھتی رہی کب تک

میرؔ جونی ذرا بتائیں تو

خود میں ٹھہریں گے آپ ہی کب تک

حال صحن وجود ٹھہرے گا

تیرا ہنگام رخصتی کب تک

khun thuke gi zindagi kab tak

yad aegi ab tiri kab tak

jane walon se puchhna ye saba

rahe abad-e-dil gali kab tak

ho kabhi to sharab wasl nasib

piye jaun main khun hi kab tak

dil ne jo umr bhar kamai hai

wo dakkhan dil se jaegi kab tak

jis mein tha soz-e-arzu us ka

shab-e-gham wo hawa chali kab tak

bani adam ki zindagi hai azab

ye khuda ko rulaegi kab tak

hadisa zindagi hai adam ki

sath degi bhala khushi kab tak

hai jahannam jo yad ab us ki

wo bahisht-e-wajud thi kab tak

wo saba us ke ban jo ai thi

wo use puchhti rahi kab tak

mir joni zara bataen to

khud mein thahrenge ap hi kab tak

hal sehn-e-wajud thahrega

tera hangam-e-rukhsati kab tak