جو زندگی بچی ہے اسے مت گنوائیے

جو زندگی بچی ہے اسے مت گنوائیے

بہتر یہ ہے کہ آپ مجھے بھول جائیے

ہر آن اک جدائی ہے خود اپنے آپ سے

ہر آن کا ہے زخم جو ہر آن کھائیے

تھی مشورت کی ہم کو بسانا ہے گھر نیا

دل نے کہا کہ میرے در و بام ڈھائیے

تھوکا ہے میں نے خون ہمیشہ مذاق میں

میرا مذاق آپ ہمیشہ اڑائیے

ہرگز مرے حضور کبھی آئیے نہ آپ

اور آئیے اگر تو خدا بن کے آئیے

اب کوئی بھی نہیں ہے کوئی دل محلے میں

کس کس گلی میں جائیے اور گل مچائیے

اک طور دہ صدی تھا جو بے طور ہو گیا

اب جنتری بجائیے تاریخ گائیے

اک لال قلعہ تھا جو میاں زرد پڑ گیا

اب رنگ ریز کون سے کس جا سے لائیے

شاعر ہے آپ یعنی کہ سستے لطیف گو

رشتوں کو دل سے روئیے سب کو ہنسائیے

جو حالتوں کا دور تھا وہ تو گزر گیا

دل کو جلا چکے ہیں سو اب گھر جلائیے

اب کیا فریب دیجیے اور کس کو دیجیے

اب کیا فریب کھائیے اور کس سے کھائیے

ہے یاد پر مدار میرے کاروبار کا

ہے عرض آپ مجھ کو بہت یاد آئیے

بس فائلوں کا بوجھ اٹھایا کریں جناب

مصرعہ یہ جونؔ کا ہے اسے مت اٹھائیے

jo zindagi bachi hai use mat ganwaiye

behtar ye hai ke ap mujhe bhul jaiye

har an ik judai hai khud apne ap se

har an ka hai zakhm jo har an khaiye

thi mashwarat ki ham ko basana hai ghar naya

dil ne kaha ke mere dar-o-bam dhaiye

thuka hai main ne khun hamesha mazaq mein

mera mazaq ap hamesha uraiye

hargiz mire huzur kabhi aiye na ap

aur aiye agar to khuda ban ke aiye

ab koi bhi nahin hai koi dil mohalle mein

kis kis gali mein jaiye aur gul machaiye

ik tur da sadi tha jo be tur ho gaya

ab jantari bajaiye tarikh gaiye

ik lal qila tha jo miyan zard par gaya

ab rang rez kaun se kis ja se laiye

shayar hai ap yaani ke saste latif go

rishton ko dil se roiye sab ko hansaiye

jo halaton ka daur tha wo to guzar gaya

dil ko jala chuke hain so ab ghar jalaiye

ab kya fareb dijiye aur kis ko dijiye

ab kya fareb khaiye aur kis se khaiye

hai yad par madar mere karobar ka

hai arz ap mujh ko bahut yad aiye

bas failon ka bojh uthaya karen janab

misra ye jon ka hai use mat uthaiye