ہم آندھیوں کے بن میں کسی کارواں کے تھے

ہم آندھیوں کے بن میں کسی کارواں کے تھے

جانے کہاں سے آئے ہیں جانے کہاں کے تھے

اے جان داستاں تجھے آیا کبھی خیال

وہ لوگ کیا ہوئے جو تری داستاں کے تھے

ہم تیرے آستاں پہ یہ کہنے کو آئے ہیں

وہ خاک ہو گئے جو ترے آستاں کے تھے

مل کر تپاک سے نہ ہمیں کیجیے اداس

خاطر نہ کیجیے کبھی ہم بھی یہاں کے تھے

کیا پوچھتے ہو نام و نشان مسافراں

ہندوستاں میں آئے ہیں ہندوستاں کے تھے

اب خاک اڑ رہی ہے یہاں انتظار کی

اے دل یہ بام و در کسی جان جہاں کے تھے

ہم کس کو دیں بھلا در و دیوار کا حساب

یہ ہم جو ہیں زمیں کے نہ تھے آسماں کے تھے

ہم سے چھنا ہے ناف پیالہ ترا میاں

گویا ازل سے ہم صف لب تشنگاں کے تھے

ہم کو حقیقتوں نے کیا ہے خراب و خوار

ہم خواب خواب اور گمان گماں کے تھے

صد یاد یاد جونؔ وہ ہنگام دل کہ جب

ہم ایک گام کے نہ تھے پر ہفت خواں کے تھے

وہ رشتہ ہائے ذات جو برباد ہو گئے

میرے گماں کے تھے کہ تمہارے گماں کے تھے

ham andhiyon ke ban mein kisi karwan ke the

jane kahan se ae hain jane kahan ke the

ai jan dastan tujhe aya kabhi khayal

wo log kya hue jo tiri dastan ke the

ham tere astan pe ye kahne ko ae hain

wo khak ho gae jo tire astan ke the

mil kar tapak se na hamen kijiye udas

khatir na kijiye kabhi ham bhi yahan ke the

kya puchhte ho nam-o-nishan-e-musafiran

hindostan mein ae hain hindostan ke the

ab khak ur rahi hai yahan intizar ki

ai dil ye bam-o-dar kisi jan-e-jahan ke the

ham kis ko den bhala dar-o-diwar ka hisab

ye ham jo hain zamin ke na the asman ke the

ham se chhanna hai naf-e-pyala tira miyan

goya azal se ham saf lab tishnigan ke the

ham ko haqiqaton ne kiya hai kharab-o-khwar

ham khwab khwab aur guman-e-guman ke the

sad yad yad jon wo hangam-e-dil ke jab

ham ek gam ke na the par haft khwan ke the

wo rishta ha-e-zat jo barbad ho gae

mere guman ke the ke tumhare guman ke the