شرح بے دردئ حالات نہ ہونے پائی

شرح بے دردئ حالات نہ ہونے پائی

اب کے بھی دل کی مدارات نہ ہونے پائی

پھر وہی وعدہ جو اقرار نہ بننے پایا

پھر وہی بات جو اثبات نہ ہونے پائی

پھر وہ پروانے جنہیں اذن شہادت نہ ملا

پھر وہ شمعیں کہ جنہیں رات نہ ہونے پائی

پھر وہی جاں بلبی لذت مے سے پہلے

پھر وہ محفل جو خرابات نہ ہونے پائی

پھر دم دید رہے چشم و نظر دید طلب

پھر شب وصل ملاقات نہ ہونے پائی

پھر وہاں باب اثر جانئے کب بند ہوا

پھر یہاں ختم مناجات نہ ہونے پائی

فیضؔ سر پر جو ہر اک روز قیامت گزری

ایک بھی روز مکافات نہ ہونے پائی

sharh-e-be dardi-e-halat na hone pai

ab ke bhi dil ki madarat na hone pai

phir wahi waada jo iqrar na banne paya

phir wahi bat jo isbat na hone pai

phir wo parwane jinhen izn-e-shahadat na mila

phir wo shamen ke jinhen rat na hone pai

phir wahi jan balbi lazzat-e-mai se pahle

phir wo mahfil jo kharabat na hone pai

phir dam-e-did rahe chashm-o-nazar did talab

phir shab-e-wasl mulaqat na hone pai

phir wahan bab-e-asar janiye kab band hua

phir yahan khatm munajat na hone pai

faiz sar par jo har ik roz-e-qayamat guzri

ek bhi roz-e-mukafat na hone pai