یوں بہار آئی ہے اس بار کہ جیسے قاصد — فیض احمد فیض (Faiz Ahmad Faiz)

یوں بہار آئی ہے اس بار کہ جیسے قاصد

کوچۂ یار سے بے نیل مرام آتا ہے

ہر کوئی شہر میں پھرتا ہے سلامت دامن

رند مے خانے سے شائستہ خرام آتا ہے

ہوس مطرب و ساقی میں پریشاں اکثر

ابر آتا ہے کبھی ماہ تمام آتا ہے

شوق والوں کی حزیں محفل شب میں اب بھی

آمد صبح کی صورت ترا نام آتا ہے

اب بھی اعلان سحر کرتا ہوا مست کوئی

داغ دل کر کے فروزاں سر شام آتا ہے