یاد کا پھر کوئی دروازہ کھلا آخر شب

یاد کا پھر کوئی دروازہ کھلا آخر شب

دل میں بکھری کوئی خوشبوئے قبا آخر شب

صبح پھوٹی تو وہ پہلو سے اٹھا آخر شب

وہ جو اک عمر سے آیا نہ گیا آخر شب

چاند سے ماند ستاروں نے کہا آخر شب

کون کرتا ہے وفا عہد وفا آخر شب

لمس جانانہ لیے مستیٔ پیمانہ لیے

حمد باری کو اٹھے دست دعا آخر شب

گھر جو ویراں تھا سر شام وہ کیسے کیسے

فرقت یار نے آباد کیا آخر شب

جس ادا سے کوئی آیا تھا کبھی اول شب

اسی انداز سے چل باد صبا آخر شب

yad ka phir koi darwaza khula akhir-e-shab

dil mein bikhri koi khushbu-e-qaba akhir-e-shab

subh phuti to wo pahlu se utha akhir-e-shab

wo jo ik umr se aya na gaya akhir-e-shab

chand se mand sitaron ne kaha akhir-e-shab

kaun karta hai wafa ahd-e-wafa akhir-e-shab

lams-e-janana liye masti-e-paimana liye

hamd bari ko uthe dast-e-dua akhir-e-shab

ghar jo wiran tha sar-e-sham wo kaise kaise

furqat-e-yar ne abad kiya akhir shab

jis ada se koi aya tha kabhi awwal-e-shab

isi andaz se chal bad-e-saba akhir-e-shab