ستم سکھلائے گا رسم وفا ایسے نہیں ہوتا

ستم سکھلائے گا رسم وفا ایسے نہیں ہوتا

صنم دکھلائیں گے راہ خدا ایسے نہیں ہوتا

گنو سب حسرتیں جو خوں ہوئی ہیں تن کے مقتل میں

مرے قاتل حساب خوں بہا ایسے نہیں ہوتا

جہان دل میں کام آتی ہیں تدبیریں نہ تعزیریں

یہاں پیمان تسلیم و رضا ایسے نہیں ہوتا

ہر اک شب ہر گھڑی گزرے قیامت یوں تو ہوتا ہے

مگر ہر صبح ہو روز جزا ایسے نہیں ہوتا

رواں ہے نبض دوراں گردشوں میں آسماں سارے

جو تم کہتے ہو سب کچھ ہو چکا ایسے نہیں ہوتا

sitam sukhlae ga rasm-e-wafa aise nahin hota

sanam dikhlaenge rah-e-khuda aise nahin hota

gino sab hasraten jo khun hui hain tan ke maqtal mein

mire qatil hisab-e-khun baha aise nahin hota

jahan-e-dil mein kam ati hain tadbiren na taaziren

yahan paiman-e-taslim-o-raza aise nahin hota

har ik shab har ghari guzre qayamat yun to hota hai

magar har subh ho roz-e-jaza aise nahin hota

rawan hai nabz-e-dauran gardishon mein asman sare

jo tum kahte ho sab kuchh ho chuka aise nahin hota