حسن مرہون جوش بادۂ ناز

حسن مرہون جوش بادۂ ناز

عشق منت کش فسون نیاز

دل کا ہر تار لرزش پیہم

جاں کا ہر رشتہ وقف سوز و گداز

سوزش درد دل کسے معلوم

کون جانے کسی کے عشق کا راز

میری خاموشیوں میں لرزاں ہے

میرے نالوں کی گم شدہ آواز

ہو چکا عشق اب ہوس ہی سہی

کیا کریں فرض ہے ادائے نماز

تو ہے اور اک تغافل پیہم

میں ہوں اور انتظار بے انداز

خوف ناکامئ امید ہے فیضؔ

ورنہ دل توڑ دے طلسم مجاز

husn marhun josh-e-bada-e-naz

ishq minnat kash-e-fusun-e-niyaz

dil ka har tar-e-larzish-e-paiham

jan ka har rishta waqf-e-soz-o-gudaz

sozish-e-dard-e-dil kise maalum

kaun jane kisi ke ishq ka raz

meri khamoshiyon mein larzan hai

mere nalon ki gum shuda awaz

ho chuka ishq ab hawas hi sahi

kya karen farz hai ada-e-namaz

tu hai aur ik taghaful-e-paiham

main hun aur intizar be andaz

khauf nakami-e-umid hai faiz

warna dil tor de tilism-e-majaz