کشتی ہوس ہواؤں کے رخ پر اتار دے
Zafar Iqbal (b. 1932)کشتی ہوس ہواؤں کے رخ پر اتار دے
کھوئے ہوؤں سے مل یہ دلدر اتار دے
بے سمت کی اڑان ہے شوخی شباب کی
اس چھت پہ آج تو یہ کبوتر اتار دے
میں اتنا بد معاش نہیں یعنی کھل کے بیٹھ
چبھنے لگی ہے دھوپ سوئیٹر اتار دے
دن رات یوں نہ خوف کا گٹھر اٹھائے پھر
یہ بوجھ اپنے سر سے جھٹک کر اتار دے
اس کی ہی آب و تاب سے روشن ہو ریگ دل
یہ تیغ میرے سینے کے اندر اتار دے
چہرے سے جھاڑ پچھلے برس کی کدورتیں
دیوار سے پرانا کلنڈر اتار دے
یہ بات ظرف کی نہیں ہے ماوراے ظرف
چاہے تو اس کنویں میں سمندر اتار دے
لوگوں کے ساتھ میری لڑائی ہے آج کل
بہتر ہے مجھ کو شہر سے باہر اتار دے
تو خود تو سات پردوں میں مستور ہے ظفرؔ
ملبوس تیرے آگے وہ کیونکر اتار دے
kashti hawas hawaon ke rukh par utar de
khoe huon se mil ye daliddar utar de
be samt ki uran hai shokhi shabab ki
is chhat pe aj to ye kabutar utar de
main itna bad maash nahin yaani khul ke baith
chubhne lagi hai dhup suitar utar de
din rat yun na khauf ka gathar uthae phir
ye bojh apne sar se jhatak kar utar de
us ki hi ab-o-tab se raushan ho reg-e-dil
ye tegh mere sine ke andar utar de
chehre se jhar pichhle baras ki kuduraten
diwar se purana kalnidar utar de
ye bat zarf ki nahin hai mawara-e-zarf
chahe to is kuen mein samundar utar de
logon ke sath meri larai hai aj kal
behtar hai mujh ko shahr se bahar utar de
tu khud to sat pardon mein mastur hai zafar
malbus tere age wo kyunkar utar de