رہ رہ کے زبانی کبھی تحریر سے ہم نے

رہ رہ کے زبانی کبھی تحریر سے ہم نے

قائل کیا اس کو اسی تدبیر سے ہم نے

کس سمت لیے جاتے ہو اور کیا ہے ارادہ

پوچھا نہ کبھی اپنے عناں گیر سے ہم نے

دل پر کوئی قابو نہ رہا جب تو کسی طور

باندھا ہے یہ وحشی تری زنجیر سے ہم نے

ہر بار مدد کے لیے اوروں کو پکارا

یا کام لیا نعرۂ تکبیر سے ہم نے

بہتر ہے کہ اب کام کوئی اور کیا کر

یہ بھی نہ کہا کاتب تقدیر سے ہم نے

اپنی ہی کرامات دکھاتے رہے سب کو

سرقہ نہ کیا معجزۂ میرؔ سے ہم نے

تخریب تو کرتے رہے سو طرح کی لیکن

یہ کام کیا جذبۂ تعمیر سے ہم نے

اب دیکھیے کیا اس کا نکلتا ہے نتیجہ

ماتھا ہے لگایا ہوا تاثیر سے ہم نے

وہ بام تماشا ہوا غائب تو ظفرؔ آج

لٹکا لیا خود کو کسی شہتیر سے ہم نے

rah rah ke zabani kabhi tahrir se ham ne

qail kiya us ko isi tadbir se ham ne

kis samt liye jate ho aur kya hai irada

puchha na kabhi apne inan gir se ham ne

dil par koi qabu na raha jab to kisi taur

bandha hai ye wahshi tiri zanjir se ham ne

har bar madad ke liye auron ko pukara

ya kam liya naara-e-takbir se ham ne

behtar hai ke ab kam koi aur kiya kar

ye bhi na kaha katib-e-taqdir se ham ne

apni hi karamat dikhate rahe sab ko

sarqa na kiya mojiza-e-mir se ham ne

takhrib to karte rahe sau tarah ki lekin

ye kam kiya jazba-e-taamir se ham ne

ab dekhiye kya us ka nikalta hai natija

matha hai lagaya hua tasir se ham ne

wo bam-e-tamasha hua ghaib to zafar aj

latka liya khud ko kisi shahtir se ham ne