Arooz is now on the App Store, for iPhone and iPad. Download →

All poetry

ہوا بدل گئی اس بے وفا کے ہونے سے

Zafar Iqbal (b. 1932)

ہوا بدل گئی اس بے وفا کے ہونے سے

وگرنہ خلق تو خوش تھی خدا کے ہونے سے

خبر نہیں مجھے مطلوب اور کیا ہے کہ میں

زیادہ خوش نہیں ارض و سما کے ہونے سے

ہمیشہ بر سر پیکار ہوں کہیں نہ کہیں

مجھے علاقہ نہیں بچ بچا کے ہونے سے

یہ شعلہ دل سے الگ ہو کے بھی نکل آیا

کچھ آگ پھیل گئی ہے ہوا کے ہونے سے

یہ شہر کچھ بھی مضافات کے بغیر نہیں

وجود اصل میں ہے ماورا کے ہونے سے

جدائی چھوڑتی رہتی ہے وصل کی خوشبو

میں زندہ رہتا ہوں اکثر قضا کے ہونے سے

میں پرزہ پرزہ پڑا ہوں جہاں تہاں ہر سمت

خفا سبھی ہیں مرے جا بجا کے ہونے سے

ضرورتیں ہی مری ہو نہیں رہیں پوری

رکا ہے قافلہ اک بے نوا کے ہونے سے

جو رہ گئی ہے یہ ایک آنچ کی کسر تو ظفرؔ

وہ زرگری تھی کسی کیمیا کے ہونے سے