کسی نئی طرح کی روانی میں جا رہا تھا

کسی نئی طرح کی روانی میں جا رہا تھا

چراغ تھا کوئی اور پانی میں جا رہا تھا

رکا ہوا تھا وہ قافلہ تو مگر ابھی تک

غبار اپنی ہی بے کرانی میں جا رہا تھا

مجھے خبر تھی وہ کیا کرے گا سلوک مجھ سے

سو میں بظاہر تو خوش گمانی میں جا رہا تھا

میں تنگئ دل سے خوش نہیں تھا اسی سبب سے

مکاں سے باہر کی لا مکانی میں جا رہا تھا

تم اپنی مستی میں آن ٹکرائے مجھ سے یک دم

ادھر سے میں بھی تو بے دھیانی میں جا رہا تھا

تری رکاوٹ سے بھی مرے پانو کیسے رکتے

کہ میں کسی اور سر گرانی میں جا رہا تھا

مرے لیے اجنبی تھا سیلاب خواب میں وہ

جو لفظ چپ چاپ موج معنی میں جا رہا تھا

سخن سے بیمار کیوں نہ ہوتا میں آخر اپنے

کہ لطف سارا تو خوش بیانی میں جا رہا تھا

ظفرؔ مرے خواب وقت آخر بھی تازہ دم تھے

یہ لگ رہا تھا کہ میں جوانی میں جا رہا تھا

kisi nai tarah ki rawani mein ja raha tha

charagh tha koi aur pani mein ja raha tha

ruka hua tha wo qafila to magar abhi tak

ghubar apni hi be karani mein ja raha tha

mujhe khabar thi wo kya karega suluk mujh se

so main bazahir to khush gumani mein ja raha tha

main tangi-e-dil se khush nahin tha isi sabab se

makan se bahar ki la makani mein ja raha tha

tum apni masti mein an takrae mujh se yak dam

idhar se main bhi to be dhyani mein ja raha tha

tiri rukawat se bhi mire paon kaise rukte

ke main kisi aur sar girani mein ja raha tha

mire liye ajnabi tha sailab khwab mein wo

jo lafz chup chap mauj-e-maani mein ja raha tha

sukhan se bimar kyun na hota main akhir apne

ke lutf sara to khush bayani mein ja raha tha

zafar mire khwab waqt akhir bhi taza dam the

ye lag raha tha ke main jawani mein ja raha tha