گرنے کی طرح کا نہ سنبھلنے کی طرح کا

گرنے کی طرح کا نہ سنبھلنے کی طرح کا

سارا وہ سفر خواب میں چلنے کی طرح کا

بارش کی بہت تیز ہوا میں کہیں مجھ کو

درپیش تھا اک مرحلہ جلنے کی طرح کا

اک چاند ابھرنے کی طرح کا مرے باہر

سورج مرے اندر کوئی ڈھلنے کی طرح کا

ایسا ہے کہ رہتا ہے سدا ساتھ بھی اس کے

منظر کوئی پوشاک بدلنے کی طرح کا

اڑتی ہوئی سی ریت وہی دشت میں ہر سو

پانی وہی دریا میں اچھلنے کی طرح کا

کیسی یہ خزاں چھائی ہے مجھ میں کہ سراسر

موسم ہے وہی پھولنے پھلنے کی طرح کا

کیا دل کا بھروسا ہے کہ اس آب و ہوا میں

ویسے ہی یہ پودا نہیں پلنے کی طرح کا

معلوم بھی تھا مجھ کو مگر بھول چکا ہوں

رستہ کوئی جنگل سے نکلنے کی طرح کا

میں تو یہی سمجھا ظفرؔ اس بار بھی شاید

مجھ پر یہ برا وقت ہے ٹلنے کی طرح کا

girne ki tarah ka na sambhalne ki tarah ka

sara wo safar khwab mein chalne ki tarah ka

barish ki bahut tez hawa mein kahin mujh ko

darpesh tha ik marhala jalne ki tarah ka

ik chand ubharne ki tarah ka mire bahar

suraj mire andar koi dhalne ki tarah ka

aisa hai ke rahta hai sada sath bhi us ke

manzar koi poshak badalne ki tarah ka

urti hui si ret wahi dasht mein har su

pani wahi dariya mein uchhalne ki tarah ka

kaisi ye khizan chhai hai mujh mein ke sarasar

mausam hai wahi phulne phalne ki tarah ka

kya dil ka bharosa hai ke is ab-o-hawa mein

waise hi ye pauda nahin palne ki tarah ka

maalum bhi tha mujh ko magar bhul chuka hun

rasta koi jangal se nikalne ki tarah ka

main to yahi samjha zafar is bar bhi shayad

mujh par ye bura waqt hai talne ki tarah ka