دل کو رہین بند قبا مت کیا کرو

دل کو رہین بند قبا مت کیا کرو

ہے لا علاج اس کی دوا مت کیا کرو

ویسے تو اختیار ہے سارا تمہیں مگر

جو ناروا ہے اس کو روا مت کیا کرو

توفیق تو ہوئی نہیں خیرات کی کبھی

کہتے ہیں اس گلی میں صدا مت کیا کرو

جو مل گئے ہیں ان کی تواضع کو چھوڑ کر

جو کھو گئے ہیں ان کا پتا مت کیا کرو

اس کا معاملہ ہے جدا وضع ہی کچھ اور

دل میں حساب تنگی جا مت کیا کرو

کچھ اور لوگ ہیں یہاں اس کام کے لیے

واجب ہے جو بھی قرض ادا مت کیا کرو

جیسا بھی ہے وہ یار ہے اپنا کھلا ڈلا

کچھ اس لیے بھی خوف خدا مت کیا کرو

سچ ہے کہ ہم سے بات بھی کرنا نماز ہے

گر ہو سکے تو اس کو قضا مت کیا کرو

تم سے تو ہے ظفرؔ کا بس اتنا مطالبہ

خود سے اسے زیادہ جدا مت کیا کرو

dil ko rahin band-e-qaba mat kiya karo

hai la ilaj us ki dawa mat kiya karo

waise to ikhtiyar hai sara tumhen magar

jo narawa hai us ko rawa mat kiya karo

taufiq to hui nahin khairat ki kabhi

kahte hain us gali mein sada mat kiya karo

jo mil gae hain un ki tawazo ko chhor kar

jo kho gae hain un ka pata mat kiya karo

us ka muamla hai juda waza hi kuchh aur

dil mein hisab tangi ja mat kya karo

kuchh aur log hain yahan is kam ke liye

wajib hai jo bhi qarz ada mat kiya karo

jaisa bhi hai wo yar hai apna khula dala

kuchh is liye bhi khauf-e-khuda mat kiya karo

sach hai ke ham se bat bhi karna namaz hai

gar ho sake to us ko qaza mat kiya karo

tum se to hai zafar ka bas itna mutaliba

khud se use ziyada juda mat kiya karo