کھینچ لائی ہے یہاں لذت آزار مجھے

کھینچ لائی ہے یہاں لذت آزار مجھے

جہاں پانی نہ ملے آج وہاں مار مجھے

دھوپ ظالم ہی سہی جسم توانا ہے ابھی

یاد آئے گا کبھی سایۂ اشجار مجھے

سال ہا سال سے خاموش تھے گہرے پانی

اب نظر آئے ہیں آواز کے آثار مجھے

باغ کی قبر پہ روتے ہوئے دیکھا تھا جسے

نظر آیا وہی سایہ سر دیوار مجھے

گر کے صد پارہ ہوا ابر میں اٹکا ہوا چاند

سر پہ چادر سی نظر آئی شب تار مجھے

سانس میں تھا کسی جلتے ہوئے جنگل کا دھواں

سیر گلزار دکھاتے رہے بے کار مجھے

رات کے دشت میں ٹوٹی تھی ہوا کی زنجیر

صبح محسوس ہوئی ریت کی جھنکار مجھے

وہی جامہ کہ مرے تن پہ نہ ٹھیک آتا تھا

وہی انعام ملا عاقبت کار مجھے

جب سے دیکھا ہے ظفرؔ خواب شبستان خیال

بستر خاک پہ سونا ہوا دشوار مجھے

khinch lai hai yahan lazzat-e-azar mujhe

jahan pani na mile aj wahan mar mujhe

dhup zalim hi sahi jism tawana hai abhi

yad aega kabhi saya-e-ashjar mujhe

sal ha sal se khamosh the gahre pani

ab nazar ae hain awaz ke asar mujhe

bagh ki qabr pe rote hue dekha tha jise

nazar aya wahi saya sar-e-diwar mujhe

gir ke sad para hua abr mein atka hua chand

sar pe chadar si nazar ai shab-e-tar mujhe

sans mein tha kisi jalte hue jangal ka dhuan

sair-e-gulzar dikhate rahe be kar mujhe

rat ke dasht mein tuti thi hawa ki zanjir

subh mahsus hui ret ki jhankar mujhe

wahi jama ke mire tan pe na thik ata tha

wahi inam mila aqibat kar mujhe

jab se dekha hai zafar khwab-e-shabistan-e-khayal

bistar-e-khak pe sona hua dushwar mujhe