کچھ بھی نہ اس کی زینت و زیبائی سے ہوا

کچھ بھی نہ اس کی زینت و زیبائی سے ہوا

جتنا فساد ہے مری یکتائی سے ہوا

لگتا ہے اتنا وقت مرے ڈوبنے میں کیوں

اندازہ مجھ کو خواب کی گہرائی سے ہوا

لازم تھا جست بھرنے کی خاطر یہ کام بھی

واقف میں اپنے آپ کا پسپائی سے ہوا

کافی تھا یوں تو رنگ تماشا بذات خود

جو بچ رہا وہ کام تماشائی سے ہوا

ہوں کس قدر کسی کے شمار و قطار میں

ظاہر وہاں پہ اپنی پذیرائی سے ہوا

کمزوریاں ہماری ہوئیں وا شگاف جب

اپنا بھی حشر پوری توانائی سے ہوا

جو اصل چیز تھی وہ چھپی رہ گئی کہیں

کچھ فائدہ نہ حاشیہ آرائی سے ہوا

کھلنا تھا اپنے عیب و ہنر کا بھرم کہاں

یہ بھی ہوا تو قافیہ پیمائی سے ہوا

ہنگامہ گرم ہے جو مرے چار سو ظفرؔ

سو بھی ہجوم سے نہیں تنہائی سے ہوا

kuchh bhi na us ki zinat-o-zebai se hua

jitna fasad hai miri yaktai se hua

lagta hai itna waqt mire dubne mein kyun

andaza mujh ko khwab ki gahrai se hua

lazim tha jast bharne ki khatir ye kam bhi

waqif main apne ap ka paspai se hua

kafi tha yun to rang-e-tamasha bazat-e-khud

jo bach raha wo kam tamashai se hua

hun kis qadar kisi ke shumar-o-qatar mein

zahir wahan pe apni pazirai se hua

kamzoriyan hamari huin wa shigaf jab

apna bhi hashr puri tawanai se hua

jo asl chiz thi wo chhupi rah gai kahin

kuchh faida na hashiya arai se hua

khulna tha apne aib-o-hunar ka bharam kahan

ye bhi hua to qafiya paimai se hua

hangama garm hai jo mire char su zafar

so bhi hujum se nahin tanhai se hua