ظفرؔ فسانوں کہ داستانوں میں رہ گئے ہیں

ظفرؔ فسانوں کہ داستانوں میں رہ گئے ہیں

ہم اپنے گزرے ہوئے زمانوں میں رہ گئے ہیں

عجب نہیں ہے کہ خود ہوا کے سپرد کر دیں

یہ چند تنکے جو آشیانوں میں رہ گئے ہیں

مکین سب کوچ کر گئے ہیں کسی طرف کو

اب ان کے آثار ہی مکانوں میں رہ گئے ہیں

سنا کرو صبح و شام کڑوی کسیلی باتیں

کہ اب یہی ذائقے زبانوں میں رہ گئے ہیں

پسند آئی ہے اس قدر خاطر و تواضع

جو میہماں سارے میزبانوں میں رہ گئے ہیں

ہمیں ہی شو کیس میں سجا کر رکھا گیا تھا

بڑے ہمیں شہر کی دکانوں میں رہ گئے ہیں

ابھی یہی انقلاب آیا ہے رفتہ رفتہ

جو رونے والے تھے ناچ گانوں میں رہ گئے ہیں

الگ الگ اپنا اپنا پرچم اٹھا رکھا ہے

کہ ہم قبیلوں نہ خاندانوں میں رہ گئے ہیں

ظفرؔ زمیں زاد تھے زمیں سے ہی کام رکھا

جو آسمانی تھے آسمانوں میں رہ گئے ہیں

zafar fasanon ke dastanon mein rah gae hain

ham apne guzre hue zamanon mein rah gae hain

ajab nahin hai ke khud hawa ke supurd kar den

ye chand tinke jo ashiyanon mein rah gae hain

makin sab kuch kar gae hain kisi taraf ko

ab un ke asar hi makanon mein rah gae hain

suna karo subh-o-sham karwi kasili baten

ke ab yahi zaiqe zabanon mein rah gae hain

pasand ai hai is qadar khatir-o-tawazo

jo mehman sare mezbanon mein rah gae hain

hamen hi sho kes mein saja kar rakha gaya tha

bare hamen shahr ki dukanon mein rah gae hain

abhi yahi inqilab aya hai rafta rafta

jo rone wale the nach ganon mein rah gae hain

alag alag apna apna parcham utha rakha hai

ke ham qabilon na khandanon mein rah gae hain

zafar zamin zad the zamin se hi kam rakha

jo asmani the asmanon mein rah gae hain