یہاں سب سے الگ سب سے جدا ہونا تھا مجھ کو

یہاں سب سے الگ سب سے جدا ہونا تھا مجھ کو

مگر کیا ہو گیا ہوں اور کیا ہونا تھا مجھ کو

ابھی اک لہر تھی جس کو گزرنا تھا سروں سے

ابھی اک لفظ تھا میں اور ادا ہونا تھا مجھ کو

پھر اس کو ڈھونڈنے میں عمر ساری بیت جاتی

کوئی اپنی ہی گم گشتہ صدا ہونا تھا مجھ کو

پسند آیا کسی کو میرا آندھی بن کے اٹھنا

کسی کی رائے میں باد صبا ہونا تھا مجھ کو

وہاں سے بھی گزر آیا ہوں خاموشی میں اب کے

جہاں اک شور کی صورت بپا ہونا تھا مجھ کو

در و دیوار سے اتنی محبت کس کے لیے تھی

اگر اس قید خانے سے رہا ہونا تھا مجھ کو

میں اپنی راکھ سے بے شک دوبارہ سر اٹھاتا

مگر اک بار تو جل کر فنا ہونا تھا مجھ کو

میں اندر سے کہیں تبدیل ہونا چاہتا تھا

پرانی کینچلی میں ہی نیا ہونا تھا مجھ کو

ظفرؔ میں ہو گیا کچھ اور ورنہ اصل میں تو

برا ہونا تھا مجھ کو یا بھلا ہونا تھا مجھ کو

yahan sab se alag sab se juda hona tha mujh ko

magar kya ho gaya hun aur kiya hona tha mujh ko

abhi ik lahr thi jis ko guzarna tha saron se

abhi ik lafz tha main aur ada hona tha mujh ko

phir us ko dhundne mein umr sari bit jati

koi apni hi gum gashta sada hona tha mujh ko

pasand aya kisi ko mera andhi ban ke uthna

kisi ki rae mein bad-e-saba hona tha mujh ko

wahan se bhi guzar aya hun khamoshi mein ab ke

jahan ik shor ki surat bapa hona tha mujh ko

dar-o-diwar se itni mohabbat kis ke liye thi

agar is qaid khane se raha hona tha mujh ko

main apni rakh se be shak dobara sar uthata

magar ik bar to jal kar fana hona tha mujh ko

main andar se kahin tabdil hona chahta tha

purani kenchli mein hi naya hona tha mujh ko

zafar mein ho gaya kuchh aur warna asl mein to

bura hona tha mujh ko ya bhala hona tha mujh ko