بدلہ یہ لیا حسرت اظہار سے ہم نے

بدلہ یہ لیا حسرت اظہار سے ہم نے

آغاز کیا اپنے ہی انکار سے ہم نے

دروازہ نہیں اپنے سروکار میں شامل

ہے رابطہ رکھا ہوا دیوار سے ہم نے

امکان سا کھولا ہوا ساحل کی ہوا پر

امید سی باندھی ہوئی اس پار سے ہم نے

اپنی ہی بگاڑی ہوئی صورت کے علاوہ

کچھ اور نکالا نہیں طومار سے ہم نے

اس کا بھی کوئی فائدہ پہنچا نہ کسی کو

آساں جو بر آمد کیا دشوار سے ہم نے

منزل جو ہماری تھی کہیں رہ گئی پیچھے

یہ کام لیا تندئ رفتار سے ہم نے

یہ دھوپ ہی تھی اپنی گزر گاہ سو رکھا

اک فاصلہ بھی سایۂ اشجار سے ہم نے

جانچا ہے کسی اور طریقے سے یہ سب کچھ

پرکھا ہے کسی اپنے ہی معیار سے ہم نے

اس کی بھی ادا کی ہے ظفرؔ آج تو قیمت

جو چیز خریدی نہیں بازار سے ہم نے

badla ye liya hasrat-e-izhar se ham ne

aghaz kiya apne hi inkar se ham ne

darwaza nahin apne sarokar mein shamil

hai rabta rakha hua diwar se ham ne

imkan sa khola hua sahil ki hawa par

ummid si bandhi hui us par se ham ne

apni hi bigari hui surat ke alawa

kuchh aur nikala nahin tumar se ham ne

us ka bhi koi faida pahuncha na kisi ko

asan jo bar amad kiya dushwar se ham ne

manzil jo hamari thi kahin rah gai pichhe

ye kam liya tundi-e-raftar se ham ne

ye dhup hi thi apni guzar gah so rakha

ik fasla bhi saya-e-ashjar se ham ne

jancha hai kisi aur tariqe se ye sab kuchh

parkha hai kisi apne hi meyar se ham ne

us ki bhi ada ki hai zafar aj to qimat

jo chiz kharidi nahin bazar se ham ne