یقیں کی خاک اڑاتے گماں بناتے ہیں

یقیں کی خاک اڑاتے گماں بناتے ہیں

مگر یہ طرفہ عمارت کہاں بناتے ہیں

لگا رہے ہیں نئے ذائقوں کے زخم ابھی

اساس فکر نہ طرز بیاں بناتے ہیں

قریب و دور سے بے جوڑ عکس اشیا کے

تلاش کرتے ہیں اور داستاں بناتے ہیں

کہ مل سکے نہ ہمارا سراغ ہم کو بھی

بنائے ابر و ہوا پر مکاں بناتے ہیں

پرانے ظلم میں لذت نہیں ہمارے لیے

ہم اپنے سر پہ نیا آسماں بناتے ہیں

نہیں نصیب میں مرنا سواد ساحل پر

جو ڈوبنے کے لیے کشتیاں بناتے ہیں

فلک پہ ڈھونڈتے ہیں گرد رنگ رفتۂ دل

زمیں پہ شام طلب کا نشاں بناتے ہیں

وہ جس کی لے پہ لرزتا ہے برگ برگ بدن

اس ایک رنگ سے نقش خزاں بناتے ہیں

ظفرؔ یہ وقت ہی بتلائے گا کہ آخر ہم

بگاڑتے ہیں زباں یا زباں بناتے ہیں

yaqin ki khak urate guman banate hain

magar ye turfa imarat kahan banate hain

laga rahe hain nae zaiqon ke zakhm abhi

asas fikr na tarz-e-bayan banate hain

qarib-o-dur se be jor aks ashiya ke

talash karte hain aur dastan banate hain

ke mil sake na hamara suragh ham ko bhi

banae abr-o-hawa par makan banate hain

purane zulm mein lazzat nahin hamare liye

ham apne sar pe naya asman banate hain

nahin nasib mein marna sawad-e-sahil par

jo dubne ke liye kashtiyan banate hain

falak pe dhundte hain gard rang-e-rafta-e-dil

zamin pe sham talab ka nishan banate hain

wo jis ki le pe larazta hai barg barg-e-badan

us ek rang se naqsh-e-khizan banate hain

zafar ye waqt hi batlaega ke akhir ham

bigarte hain zaban ya zaban banate hain