زندہ بھی خلق میں ہوں مرا بھی ہوا ہوں میں

زندہ بھی خلق میں ہوں مرا بھی ہوا ہوں میں

ہوں مختلف بھی اس میں پھنسا بھی ہوا ہوں میں

جو اہل شہر کو کسی صورت نہیں ہے راس

ایسی یہاں پہ آب و ہوا بھی ہوا ہوں میں

آزردہ کیوں ہیں اب مرے شیون پہ اہل باغ

کچھ دن یہاں پہ نغمہ سرا بھی ہوا ہوں میں

ان بارشوں کی مجھ کو تمنا بھی تھی بہت

دیوار سے ذرا سا مٹا بھی ہوا ہوں میں

رہتا ہوں دور اس کے دل نرم سے مگر

پتھر کی طرح اس میں جڑا بھی ہوا ہوں میں

زندہ ہوں پھر بھی ایک امید بہار پر

پتا ہوں اور شجر سے جھڑا بھی ہوا ہوں میں

رہتا نہیں ہوں بوجھ کسی پر زیادہ دیر

کچھ قرض تھا اگر تو ادا بھی ہوا ہوں میں

رکھنے لگے ہیں کچھ نظر انداز بھی یہ لوگ

منظر سے اپنے آپ ہٹا بھی ہوا ہوں میں

اک دور کے سفر پہ روانہ بھی ہوں ظفرؔ

سست الوجود گھر میں پڑا بھی ہوا ہوں میں

zinda bhi khalq mein hun mira bhi hua hun main

hun mukhtalif bhi is mein phansa bhi hua hun main

jo ahl-e-shahr ko kisi surat nahin hai ras

aisi yahan pe ab-o-hawa bhi hua hun main

azurda kyun hain ab mire shewan pe ahl-e-bagh

kuchh din yahan pe naghma sara bhi hua hun main

in barishon ki mujh ko tamanna bhi thi bahut

diwar se zara sa mita bhi hua hun main

rahta hun dur us ke dil narm se magar

patthar ki tarah is mein jura bhi hua hun main

zinda hun phir bhi ek ummid-e-bahar par

patta hun aur shajar se jhara bhi hua hun main

rahta nahin hun bojh kisi par ziyada der

kuchh qarz tha agar to ada bhi hua hun main

rakhne lage hain kuchh nazar andaz bhi ye log

manzar se apne ap hata bhi hua hun main

ik dur ke safar pe rawana bhi hun zafar

sust alwujud ghar mein para bhi hua hun main