یہ نہیں کہتا کہ دوبارہ وہی آواز دے

یہ نہیں کہتا کہ دوبارہ وہی آواز دے

کوئی آسانی تو پیدا کر کوئی آواز دے

میں اسے سن کر بھی آنے کا نہیں مجبور ہوں

پھر بھی اپنے خواب خانے سے کبھی آواز دے

ہو سکے دونوں زمانوں میں ہم آہنگی کوئی

میں پرانا ہوں تو کیا مجھ کو نئی آواز دے

موت کے ساحل پر استادہ ہوں تو مجھ کو کہیں

زندگی کے پانیوں میں ڈوبتی آواز دے

ٹھیک ہے تو نے پکارا ہوگا جس تس کو مگر

میرے حصے میں کوئی آئی ہوئی آواز دے

بن بلایا ہی چلا آؤں گا میں شاید کبھی

لیکن اتنے شور میں تو آپ بھی آواز دے

میں اسے پہچان ہی پاؤں نہ پہلی بار تو

کوئی آوازوں کے جنگل میں گھری آواز دے

منہ سے کچھ کہہ تو سہی اس خامشی کے آر پار

مستقل کو چھوڑ کوئی سرسری آواز دے

تو نے تو ہر حال میں سننا ہے اب تجھ کو ظفرؔ

روشنی آواز دے یا تیرگی آواز دے

ye nahin kahta ke dobara wahi awaz de

koi asani to paida kar koi awaz de

main use sun kar bhi ane ka nahin majbur hun

phir bhi apne khwab khane se kabhi awaz de

ho sake donon zamanon mein ham ahangi koi

main purana hun to kya mujh ko nai awaz de

maut ke sahil par istada hun to mujh ko kahin

zindagi ke paniyon mein dubti awaz de

thik hai tu ne pukara hoga jis tis ko magar

mere hisse mein koi ai hui awaz de

ban bulaya hi chala aunga mein shayad kabhi

lekin itne shor mein to ap bhi awaz de

main use pahchan hi paon na pahli bar to

koi awazon ke jangal mein ghiri awaz de

munh se kuchh kah to sahi is khamushi ke ar par

mustaqil ko chhor koi sarsari awaz de

tu ne to har hal mein sunna hai ab tujh ko zafar

raushni awaz de ya tirgi awaz de