ویراں تھی رات چاند کا پتھر سیاہ تھا

ویراں تھی رات چاند کا پتھر سیاہ تھا

یا پردۂ نگاہ سراسر سیاہ تھا

ٹوٹے ہوئے مکاں کی ادا دیکھتا کوئی

سر سبز تھی منڈیر کبوتر سیاہ تھا

میں ڈوبتا جزیرہ تھا موجوں کی مار پر

چاروں طرف ہوا کا سمندر سیاہ تھا

نشہ چڑھا تو روشنیاں سی دکھائی دیں

حیران ہوں کہ موت کا ساغر سیاہ تھا

وہ خواب تھا کہ واہمہ بس اتنا یاد ہے

باہر سفید و سرخ تھا اندر سیاہ تھا

چمکا کہیں نہ ریت کا ذرہ بھی رات بھر

صحرائے انتظار برابر سیاہ تھا

اس طرح بادلوں کی چھتیں چھائی تھیں ظفرؔ

سہمی ہوئی زمین تھی منظر سیاہ تھا

wiran thi rat chand ka patthar siyah tha

ya parda-e-nigah sarasar siyah tha

tute hue makan ki ada dekhta koi

sar sabz thi munder kabutar siyah tha

main dubta jazira tha maujon ki mar par

charon taraf hawa ka samundar siyah tha

nasha charha to raushniyan si dikhai den

hairan hun ke maut ka saghar siyah tha

wo khwab tha ke wahima bas itna yad hai

bahar safed-o-surkh tha andar siyah tha

chamka kahin na ret ka zarra bhi rat bhar

sahra-e-intizar barabar siyah tha

is tarah badalon ki chhaten chhai thin zafar

sahmi hui zamin thi manzar siyah tha